هو كامل الوزير ناوي عليه في ملف الصناعة وليه بيوطن الصناعات الإستراتيجية في مصر وايه حكاية الصناعة المهمة اللي قرر أن مصر تكون مركز إقليمي في تصنيعها وايه مردود دا على الاقتصاد الوطني.
ملف توطين الصناعة بكل أنواعها في مصر بقي حديث المصريين وعلى رأس أولويات الحكومة وبيحظي بمتابعة يومية من الرئيس السيسي شخصيا واللي اصدر تكليفات مباشره للحكومة بتوطين الصناعة الوطنية وتطويرها وتحديثها كجزء من حلول كتير لخفض فاتورة الاستيراد الضخمة واللي بترهق الموارد الدولارية بشكل كبير لأنها تستنزف ما بين 70 إلى 90 مليار دولار في السنة ودا رقم ضخم.
توطين الصناعة المحلية بجودة عالية هيضرب 10 عصافير بحجر واحد للدولة المصرية ودا لأنه اولا هيقلل الاستيراد يعني هيوفر دولارات وفي نفس الوقت هيزود التصدير وزدا معناه زيادة أكبر في معروض الدولار وكمان توطين الصناعة معناه توفير فرص العمل وتشغيل آلاف الشباب وزيادة تنافسية وقوة الاقتصاد المصري وفتح أسواق جديدة وغيرها من الفوايد الكتير وعشان كده الصناعة بتعتبر الحل السحري لكل أزمات مصر الاقتصادية والمالية تقريبا واللي بتنحسر في موارد الدولة مقارنة باحتياجات الدولة من العملة الصعبة.
والحقيقة اللي حصل من ساعة تولي الوزير كامل الوزير لوزارة الصناعة تطور كبير جدا من حيث التنفكير والتنفيذ واللي بدأ خطة طموحة جدا لتوطين الصناعات اللي بنستوردها بمليارات وملايين الدولارات وبدأ دا قبل حتي ما يتولي وزارة الصناعة لما قرر تصنيع مهمات وزارة النقل والسكة الحديد وتوطين اغلب الصناعات فيها وفاكرين لما مصر توقفت عن استيراد الاتوبيس والميني باص بعد تصنيعهم في مصر .. وكل يوم دلوقتي بنشوف تطور جديد في ملف الصناعة سواء من حيث التوسع في المنشآت والمصانع الموجودة أو دخول صناعات جديدة وتوطينها في مصر زي ما حصل كده في صناعات السيارات والموبايلات والأجهزة الكهربائية والمنزلية وشفنا ماركات عالمية نقلت مصانعها في مصر.
الجديد بقي في ملف توطين الصناعة أن الدولة دلوقتي شغالة على ملف لتوطين صناعة مهمة جدا وهي صناعة المنتجات الورقية واللي مصر كانت بتستورد منه حوالى 3 ملايين طن سنويا بما يعادل 2 مليار دولار في 2019 ومنها 37% ورق للتعبئة والتغليف ويبلغ حوالى مليون طن وفي وقت بنستورد فيه 340 ألف طن من ورق الكتابة والطباعة.. كمان حسب الأرقام مصر بتستورد حوالي 87 ألف طن من لب الورق ودا بما يعادل 53 مليون دولار في السنة ويبلغ نصيب الفرد من المنتجات الورقية فى مصر حوالى 30 كجم وهو أقل من المعدل العالمي وكلنا فاكرين أزمة استيراد ورق الفويل اللي الرئيس السيسي اتكلم فيها وقال ازاي نستورد منه حوالي 140مليون دولار هي فاتورة استيراد مصر السنوية من ورق فويل.
الفريق مهندس كامل الوزير نائب رئيس مجلس الوزراء للتنمية الصناعية وزير الصناعة والنقل وجه هيئة التنمية الصناعية بالتنسيق مع وزارة التموين واتحاد الصناعات المصرية لتشجيع القطاع الخاص على ضخ استثمارات جديدة في استخدام مخلفات قصب السكر (الباجاس)، بهدف تحويلها إلى مستلزمات إنتاج أو استخدامها في تصنيع الإيثانول بدلاً من حرقها كوقود بديل للغاز الطبيعي في مصانع السكر وأوضح الوزير أن هدف السياسة الجديدة هو تقليل التلوث وتقليل فاتورة استيراد الخامات المستخدمة في صناعات الورق والأخشاب والفايبر بورد. والوزير عقد اجتماع موسع وعرض خطة الحكومة لدمج الباجاس في صناعات متعددة زي الخشب الحبيبي، والورق، وألواح الفايبر بورد بالإضافة إلى إنتاج الإيثانول ودا تمهيد للتوسع في صناعة الورق بأنواعه لأنها صناعة استراتيجية في العالم وبتدخل في صناعات تانية كتير زي التغليف وفي تصنيع العبوات وغيرها وهتوفر ملايين الدولارات في السنة وهتفتح الباب لزيادة الصادرات بشكل كبير للأسواق الأفريقية والعالمية خاصه إن مصر أول دولة في العالم عرفت صناعة الورق في التاريخ.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
