يا ترى ليه الكويت ناوية تضخ 6.5 مليار دولار في مصر خلال سنتين؟ وإيه اللي خلى الحكومة المصرية تقول للكويتيين: الرخصة الذهبية عندكم فورًا تعالوا استثمروا؟ وهل إحنا داخلين على شراكة استراتيجية جديدة؟ ولا في خطة سرية لتوطين صناعة السيارات؟ كل الأسئلة دي بيتم تداولها في الكواليس الساعات الأخير خصوصًا بعد الإعلان الرسمي عن استثمارات كويتية جديدة هتدخل مصر بقيمة 6.5 مليار دولار قبل نهاية 2026، و4 مليار منهم هيتضخوا السنة دي بس.. فخلينا نعرف الفلوس دي هيتم استثمارها في ايه.. وهتروح لأي قطاعات؟
في زيارة مهمة جدًا الرئيس عبد الفتاح السيسي سافر الكويت.. ضمن جولة شملت كمان قطر.. وكان الهدف واضح فتح أبواب جديدة للتعاون الاقتصادي والاستثماري بين مصر والخليج.. وفعلاً النتايج بدأت تظهر بسرعة.
وبعد ما اتفقت مصر مع قطر على ضخ 7.5 مليار دولار في السوق المصري.. دلوقتي الدور على الكويت اللي بتحتل المركز الخامس في قائمة أكبر الدول المستثمرة في مصر والتالتة عربيًا بعد الإمارات والسعودية.
الاستثمارات الكويتية مش بس أرقام على الورق… دي جاية تركز على قطاعات استراتيجية زي صناعة السيارات.. السياحة.. العقارات.. الدواء.. الطاقة المتجددة.. المراكز اللوجستية.. البنية التحتية.. الزراعة.. البنوك.. الاتصالات.. البتروكيماويات.. الأغذية.. والنقل والموانئ.
" title="تحركات السيسي جابت من الآخر.. الكويت تضخ 6.2 مليار دولار في مصر" frameborder="0">
يعني بنشوف خطة استثمارية متكاملة بتخدم رؤية مصر 2030 وبتدي دفعة كبيرة لمحاور التنمية الصناعية والسياحية.
وعلشان مفيش وقت نضيعه… الحكومة المصرية أعلنتها صريحة أي مشروع كويتي جديد هياخد الرخصة الذهبية فورًا.
عارف يعني إيه رخصة ذهبية؟
يعني موافقة موحدة واحدة بتشمل كل حاجة من إقامة المشروع وتشغيله وإدارته، لحد تخصيص الأرض والبناء والتراخيص… من الآخر شيل من دماغك البيروقراطية وتعال استثمر.
كمان في تسهيلات إضافية للمشروعات الكويتيةوخصوصًا في الصناعة والسياحة.. زي تخصيص أراضي صناعية.. مع التأكيد على نسبة مكوّن محلي كبيرة في مشروعات السيارات علشان نخلي التصنيع جوه البلد مش بره.
البيزنس دلوقتي بيتكلم لغة الفرص ومصر بتقول للكويت الطريق مفروش... والمستقبل مشترك.
إجمالي عدد المشروعات المشتركة وصل لـ 1431 مشروع.. وده بيأكد إن العلاقة بين البلدين مش جديدة.. لكنها بتدخل دلوقتي في مرحلة تسريع واستراتيجية مختلفة تمامًا.
وفي ظل الظروف الإقليمية والعالمية.. مصر بتراهن على شركائها العرب.. وبتمد إيديها للاستثمارات الخليجية مش بس علشان الفلوس لكن علشان نقل التكنولوجيا وتوطين الصناعة وخلق فرص عمل حقيقية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
