هو ايه اللي حصل النهاردة في سوق الدهب العالمي.. والتوقعات رايحة على فين وايه تأثير دا على الأسعار في السوق المصري.
الدهب ركب الصاروخ وكل يوم بيرفع لمستويات قياسية في الأسواق العالمية وكمان المصرية ودا بسبب طبيعة المعدن الأصفر اللي قيمته وسعره بيزيد دائما مع اندلاع الأزمات الاقتصادية والتوترات الجيوسياسة في أي منطقة في العالم فما بالك العالم كله بيضرب يقلب بسبب القرارات الأمريكية الأخيرة وفرض رسوم جمركية أمريكية على كل دول الكوكب واللي دشنت لحرب تجارية محدش عارف هتوصل لغاية فين ودا غير التوترات الموجودة في العالم اصلا زي روسيا وأوكرانيا والشرق الأوسط وكلها أمور بتزيد من قيمة الدهب كملاذ آمن وبترفع سعره لمستويات قياسية وغير مسبوقة.
طيب ايه اللي حصل النهاردة ؟
النهاردة الرسوم الجمركية الأمريكية على الصين واللي بلغت 104% دخلت حيز التنفيذ ودا كان ليه تاثير مباشر على أسعار الدهب واللي ارتفعت ايعاره سعر الذهب مع تأهب المتداولين لرد الصين الانتقامي بفرض رسوم مضادة مساوية أو اكبر من الرسوم الجمركية الأمريكية ودا معناه زلزال قوي في الأسواق العالمية كلها وبالتالي البنوك المركزية العالمية والمستثمرين هيلجأو للدهب للتحوط من أي أزمات جاية..
وفي معاملات النهاردة الاربعاء صعد سعر الدهب بنسبة 1% مع دخول الرسوم الأمريكية حيز التنفيذ على 60 شريك تجاري وفق الجدول الزمني ومن بينها الصين وشهد المعدن الأصفر موجة ارتفاع قياسية بلغ خلالها مستوى غير مسبوق عند 3167.84 دولار للأونصة الأسبوع الماضي مدفوعاً بزيادة كبيرة في عمليات الشراء من مستثمرين يبحثون عن الأمان المالي وسط مخاوف من أن تؤدي حرب تجارية عالمية إلى ركود اقتصادي.
المحللين الاقتصاديين شايفين إن أسعار الدهب مرشحة للارتفاع خوفا من تأثير الرسوم الجمركية واحتمال إعادة تشكيل قواعد التجارة العالمية واستمرار بقاء الدهب وسيلة تحوّط جيدة ضد تقلبات الاقتصاد العالمي.. وفيه سبب تاني لارتفاعات جديدة في المعدن الأصفر وهو إن زيادة التقلبات قد تدفع بنك الاحتياطي الفيدرالي إلى تسريع وتيرة خفض أسعار الفائدة لتفادي حدوث الركود الاقتصادي.
وارتفع سعر الدهب إلى 3016.71 دولار للأونصة في اول التعاملات وزاد سعر التسليم الفوري 0.6% إلى 3001.33 دولار بحلول الساعة 12:04 مساء بتوقيت سنغافورة.
طيب ايه هيحصل في الصاغة المصرية ؟
الصاغة المصرية مرتبطة بشكل أو بآخر بالسوق العالمي واي زيادة هتاثر على سعر الدهب في مصر ودا معناه إن فيه زيادات جديدة في الطريق خاصة إن مفيش اي اخبار إيجابية في العالم ترشح الدهب للهبوط.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
