هي الحكومة جابت 52 مليار دولار منين في 6 شهور.. وياترى صرفتهم فين..وايه سر الزيادة الكبيرة في التدفقات الدولارية في الفترة الأخيرة..
معروف إن إيرادات مصر الدولارية الثابتة بتتركز في 5 مصادر رئيسية هي السياحة وقناة السويس وتحويلات المصريين بالخارج والاستثمار والتصدير وفيه موارد تاني إضافية بتدخل البلد زي الأموال الساخنة واللي بتعتبر جزء من الاستثمارات الغير المباشرة ودي بتكون عبارة عن أموال ساخنة بتضخ في السندات المصرية واذون الخزانة وبيطلق عليها ساخنة لأنها بتهرب بسرعة او حصل اي طارئ زي تخفيض الفايدة بشكل كبير او أزمات مالية زي ما حصل كده في أزمة نقص الدولار في 2022 بعد الأزمة الروسية الأوكرانية وفيه كمان موارد تانية بتيجي من برامج خاصة ومبادرات زي برنامج الطروحات الحكومية ومبادرة السيارات والإسكان الفاخر للمصريين بالخارج.
لكن كلامنا النهاردة هيكون على الموارد الخمسة الثابتين للدولار واللي بتعتمد عليها الدولة وبالارقام هنكتشف إن الموارد الدولارية دي ورغم الأزمات اللي حولينا حققت قفزات كبيرة.. وحسب الأرقام بردو ارتفعت حصيلة مصر من 5 مصادر للنقد الأجنبي بنسبة 19% إلى 52.33 مليار دولار في أول 6 شهور من العام المالي الحالي 2024-2025 مقابل 44 مليار دولار في نفس الفترة من العام المالي الماضي 2023-2024.
أول مورد معانا هو وبحسب بيان أداء ميزان المدفوعات الصادر على موقع البنك المركزي هو حصيلة النقد الأجنبي لمصر من تحويلات المصريين العاملين بالخارج وعززت تحويلات المصريين بالخارج من نمو حصيلة مصر من النقد الأجنبي لتخفف من حدة تراجع إيرادات قناة السويس التي تلقت ضربة قوية بسبب التوترات الدائرة في منطقة البحر الأحمر على مدار أكثر من عام واللي ارتفعت بنحو 80.7% خلال النص الأول من العام المالي الحالي إلى نحو 17.1 مليار دولار مقابل 9.45 مليار دولار بنفس الفترة من العام السابق.
أما حصيلة الصادرات فزادت بنسبة 13.7% خلال النص الأول من العام المالي الحالي إلى 18.71 مليار دولار مقابل 16.45 مليار دولار بنفس الفترة من العام اللي قبله.. وبخصوص إيرادات السياحة فزادت بنسبة 12.4% خلال النص الأول من العام المالي الحالي إلى 8.7 مليار دولار مقابل 7.8 مليار دولار بنفس الفترة عن العام السابق.
ونيجي لحصيلة الاستثمار الأجنبي المباشر واللي ارتفعت بنسبة 9.7% خلال النص الأول من العام المالي الحالي إلى 6 مليار دولار مقابل 5.53 مليار دولار بنفس الفترة عن العام السابق.. أما إيرادات قناة السويس فتراجعت بشكل حاد بنسبة 62.3% خلال النص الأول من العام المالي الحالي إلى نحو 1.8 مليار دولار مقابل نحو 4.8 مليار دولار بنفس الفترة من العام السابق.
طيب أيه سر ارتفاع موارد الدولة من الدولار ؟
الحقيقة فيه اسباب كتير أولها تحسن كل المؤشرات الاقتصادية بشكل عام وملحوظ وكل قطاع من القطاعات الخمسة ليه أسبابه فمثلا القفزة في موارد السياحة كان نتيجة الاستقرار السياسي والامني والاستثمارات اللي اتضحت بقوة بداية من صفقة رأس الحكمة وقرب افتتاح المتحف المصري الكبير وتحول مصر لمقصد مثالي للسياح بعد التطوير الكبير في كل المناطق الأثرية والسياحية.
أما سبب الزيادة في تحويلات المصريين فسببها القضاء على السوق السوداء للدولار بعد التعويم والحوافز اللي بتقديمها الدولة والمبادرات للمصريين بالخارج.. وفي قطاع التصدير فالزيادة جت من فتح مصر أسواق جديدة في العالم للمنتجات المصرية وبسبب برامج التوسع في التصنيع وتوطين الصناعة والاهتمام بالجودة.. وبخصوص زيادة التدفقات الاستثمارية فدا سببه الإصلاح المالي الكبير اللي حصل في مارس 2024 وتحرير سعر الصرف وانخفاض قيمة العملة المحلية وتوافر الأيدي العاملة الرخيصة واتساع الأسواق والبنية الأساسية الحديثة واللي حولت مصر لافضل سوق واعد بالمنطقة.
طيب الحكومة صرفت المليارات دي فين ؟
اي موارد دولارية بتدخل البلد بتروح اكتر من قطاع أولها استيراد السلع الأساسية والإستراتيجية من الخارج وتاني بنك توفير الدولار للمستوردين والمصنعين لاستيراد المواد الخام.. تالت بند سداد مستحقات الشركات العالمية في مصر.. وكمان جزء من الموارد الدولارية بيروح لسداد الديون الخارجية وجزء بيدخل في الاحتياطي النقدي لمصر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
