ليه منصات الشر بتهاجم مشروع كيزاد بورسعيد.. التفاصيل مفاجأة - غاية التعليمية

غاية التعليمية يكتُب.. ليه منصات الشر والإخوان هاجمت بضراوة مشروع كيزاد شرق بورسعيد وليه المشروع دا بالذات عليه هجوم شرس.. وايه حكاية المناطق اللي هتديرها موانئ أبو ظبي وعلاقتها بالسيادة الوطنية.

في الأيام الأخيرة مجلس الوزراء أعلن عن توقيع  اتفاقية تطوير منطقة كيزاد شرق بورسعيد بين الهيئة العامة للمنطقة الاقتصادية لقناة السويس ومجموعة موانئ أبو ظبي ضمن اختصاصات ونطاق المنطقة الاقتصادية.. وبمجرد الإعلان عن المشروع والتفاصيل وحجم الاستثمار والتغييرات اللي ممكن يضيفها للاقتصاد المصري اشتعلت مواقع ومنصات الفتنة والشر وبدأت تهاجم المشروع بعنف..  لدرجة أنهم روجو إن مشروع كيزاد شرق بورسعيد بيهدد السيادة المصرية.. وكمان خيالهم صورلهم إن الشركة الإماراتية هتستولي على قناة السويس وهي اللي هتديرها ل50 سنة قدام وإن الحكومة باعت قناه السويس من الاخر.

طبعا دا كلام ناس مجانين وناس كل همها الفتنة ونشر الفوضى وكلنا عارفين مين اللي بيحبك منصات الشر دي.. لكن تعالوا نعرف ليه المشروع دا بالذات اللي المنصات إياها بتهاجمها.. في الأول لازم نعرف ومن حكم التجربة والخبرة مع جماعات الشر أن أي مشروع بيهاجموه بيكون مفيد جدا للبلد ومش عاوزينه يتم أو على الأقل بيشوهوه ويخلوا الناس تشك عن طريق نشر الاشاعات حوليه.. زي ما حصل قبل كده في مشروعات كتير آخرها رأس الحكمة.

طيب مشروع كيزاد بورسعيد عامل قلق ليه؟
عشان باختصار حضرتك دا مشروع عالمي جديد في ارض مصر وهيقلب موازين القوى الاقتصادية في المنطقة  ولأنه مشروع ضخم على مساحة 20 مليون متر مربع وكل المشروع بيقع داخل نطاق منطقة شرق بورسعيد الصناعية التابعة للمنطقة الاقتصادية لقناة السويس والبالغ مساحتها الإجمالية نحو 64 مليون متر مربع وملهوش علاقة بميناء شرق بورسعيد وكمان المشروع ملهوش اي علاقة بالمجري الملاحي لقناة السويس زي ما قالت منصات الشر.

مجلس الوزراء رد طبعا على كل المعلومات المغلوطة اللي تم ترويجها على المشروع الإماراتي وقال إن الاتفاقية لا تمت بصلة للممر الملاحي لقناة السويس واللي بيخضع بالكامل لإدارة وسيادة هيئة قناه السويس وإن الهيئتين مستقلتين عن بعضهما وقال كمان إن الاتفاقية لا تمس بأي شكل من الأشكال السيادة المصرية على قناة السويس أو ممتلكاتها و أن قناة السويس محمية دستوريا بموجب الدستور المصري.

نرجع بقي لتفاصيل مشروع كيزاد بورسعيد وسر غضب الإخوان منه .. شوف ياسيدي حسب الاتفاقية مع الحكومة المصرية مجموعة موانئ أبوظبي هتقوم بتطوير وتشغيل وتنمية منطقة صناعية لوجستية خدمية بنظام المطور الصناعي وهتتولي الترويج للمنطقة لجذب الاستثمار في القطاعات الصناعية واللوجستية المستهدفة.. المشروع كمان هيحقق عوائد تانية كتير غير مباشرة زي توطين الصناعة ونقل التكنولوجيا المتقدمة وتوفير العديد من فرص العمل المباشرة وغير المباشرة وكمان تنمية موارد الدولة من العائدات الضريبية والجمركية والقيمة المضافة.
المشروع متوقع كمان يرفع من تجارة الترانزيت ودعم سلاسل الإمداد العالمية بالإضافة لتعزيز الصادرات المصرية  ودا بخلاف ان المشروع هيعمل منطقة صناعية متكاملة لخدمة مختلف القطاعات الإنتاجية وهتتمتع ببنية تحتية حديثة مطابقة للمعايير الدولية ..

مش كده وبس المشروع بيشمل خطط مستقبلية لإنشاء رصيف بحري ومحطة متعددة الأغراض بجانب استقطاب مستثمرين في مجالات التصنيع والخدمات اللوجستية والتكنولوجيا..  المشروع هيساهم كمان في تعزيز مكانة مصر كمركز محوري للتجارة والصناعة يربط بين الشرق والغرب وتطوير محور قناة السويس ليصبح ممر اقتصادي عالمي  وتعظيم أهمية الللوحستيات المصرية..

اكيد حضرتك بعد المعلومات والبيانات والتفاصيل دي عرفت ليه المشروع الجديد في شرق بورسعيد بيتعرض لكل الهجوم دا... لانه باختصار فيه ناس كتير مش عاوزين البلد دي تنهض وتتطور وتحقق أهدافها ويكون عندها اقتصاد قوي وعالمي.