هو إيه اللى بيحصل فى سوق الصاغة الساعات الأخيرة؟ وليه الدهب أسعاره بتتراجع بشكل كبير بشكل يومي؟ وايه علاقة اللى بيحصل بالسعر العالمي للمعدن النفيس؟ وايه اللى خلاه يتراجع فجأة أكتر من 250 دولار في كام يوم بس؟و إزاي ليلة واحدة بس تقلب موازين السوق.. وتخلي الناس في مصر يبصوا للدهب بطريقة مختلفة؟
من كام يوم.. الأسواق العالمية شافت هزة كبيرة.. أسعار الدهب العالمية.. اللي كانت طايرة في السما.. نزلت بشكل مفاجئ.. الأونصة اللي وصلت لـ 3500 دولار في وقت سابق.. دلوقتي بقت حوالي 3300 دولار.. يعني خسارة أكتر من 250 دولار في أيام معدودة.
ليه ده حصل؟
الحكاية فيها عوامل كتير.. أولها إن الدولار الأمريكي بدأ يتماسك.. وبقى أقوى قدام العملات التانية.. وطبعاً الدهب والدولار زي الميزان.. لما واحد يطلع.. التاني ينزل.. كمان التوترات التجارية بين أمريكا وشركاءها زي الصين هديت شوية.. والمستثمرين بدأوا يبعدوا عن الدهب كملاذ آمن. ويروحوا لاستثمارات تانية زي الأسهم أو السندات.
طب إيه اللي بيحصل في مصر؟
هنا السوق ليه قواعد تانية.. الدهب عندنا مش بس استثمار.. ده جزء من ثقافتنا.. من الشبكة للمدخرات.. بس الغريب إن الناس مش متهافتة زي الأول على شراء الدهب.. عشان فيه استقرار اقتصادي بدأ يبان.. سعر الدولار في البنوك استقر ما بين 50.86 و51.36 جنيه.. وده خفف الضغط على الناس اللي كانت بتجري تشتري دهب خوفاً من زيادة سعر الدولار في السوق السودا.. كمان الطلب على الدهب محلياً قل بشكل ملحوظ.. التقارير بتقول إن الإقبال على شراء الدهب في مصر انخفض بنسبة 28% في الربع التالت من 2024 مقارنة بالربع اللي قبله.. يعني الناس بدأت تحس إن الاقتصاد بياخد نفَس.
طب لما الدهب ينزل عالمياً.. وفي مصر الناس تبطل تشتري.. إيه اللي بيحصل لأزمة نقص الدولار؟
في الحقيقة.. ده ممكن يكون خبر كويس.. عشان لما الطلب على الدهب يقل.. الضغط على الدولار في السوق الموازية بيخف.. الناس اللي كانت بتحوش فلوسها بالدولار عشان تشتري دهب.. دلوقتي بقت أقل.. وده بيدعم استقرار سعر الصرف.. يعني بدل ما الناس تروح للسوق السودا تشتري دولار بأسعار نار.. بقت بتستنى وتشوف الوضع هيروح لفين.. كمان البنك المركزي المصري بيحاول يتحكم في التضخم وسعر الفايدة.. وده بيدي إحساس بالثقة إن الاقتصاد ماشي على الطريق الصح.
بس الحقيقة.. الدهب لسه ملاذ آمن..
حتى لو الأسعار نزلت شوية.. الناس في مصر لسه بتبص للدهب على إنه الحل السحري في الأزمات.. بس اللي بيحصل دلوقتي إن القلق قل.. والناس بدأت تفكر بعقلها أكتر.. يعني بدل ما يتسابقوا على الصاغة.. بقوا يحسبوها بالورقة والقلم.. وده بيخلّي السوق أكتر استقراراً.. ويقلل الضغط على الدولار.. يعني لو الوضع فضل كده.. ممكن نشوف تحسن تدريجي في أزمة نقص الدولار.. بس طبعاً ده محتاج وقت وصبر.
ليلة سقوط الدهب مكانتش مجرد خبر عابر.. دي كانت إشارة إن الأسواق العالمية والمحلية بتتغير.. وإن مصر.. بكل التحديات اللي بتواجهها.. بدأت تاخد خطوات ناحية الاستقرار.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
