مصر حاليا بقت هدف رئيسي للاستثمارات الأجنبية خصوصا في المنطقة الاقتصادية لقناة السويس واللي حاليا بصدد استقبال دفعة جديدة من الاستثمار الخارجي هتغير خريطة التصدير للخارج.. وهتحول مصر لدولة من الطراز الصناعي الرفيع.
من بداية الفترة الرئاسية الجديدة للرئيس عبدالفتاح السيسي صدرت توجيهات رئاسية للحكومة بتقديم كل التحفيزات اللازمة لدخول الاستثمارات ورؤوس الأموال الأجنبية للسوق المصري، خصوصا أن مصر عندها حلم لتحويل مصر لمركز اقليمي للتبادل التجاري والوصول لتحقيق 140 مليار دولار كايرادات من الصادرات المصرية، وعلشان نوصل للرقم ده الحكومة بتحاول تسوق مصر في كل دول العالم لتعريف المستثمرين واصحاب رؤوس الاموال بالفرص الاستثمارية الموجودة بالسوق المصري.
طيب اية اللي بيحصل في المنطقة الاقتصادية لقناة السويس، والحكومة بتستهدف الوصول لكام شركة هناك؟.
التحفيزات اللي قامت بيها الحكومة علي مدار السنين اللي فاتت والجهود الترويجية اللي قامت بيها الحكومة للترويج للفرص الاستثمارية الموجودة في السوق المصري نجحت في الوصول بحجم الاستثمارات الاجنبية في السوق المصري لـ272 مشروع باستثمارات وصلت لأكثر من 8.3 مليار دولار، وفرت أكثر من 40.2 ألف فرصة عمل خلال الـ 33 شهرًا الماضية، وصل نصيب المناطق الصناعية منهم لـ 262 مشروع بتكلفة استثمارية إجمالية وصلت لـ6.8 مليار دولار.
المشروعات الجديدة اللي دخلت المنطقة الاقتصادية لقناة السويس في منهم 130 مشروع حاليا بدأ يتشغل ويطلع انتاج جزء منه مخصص لتغطية احتياجات السوق المصري وباقي الانتاج مخصص للتصدير للخارج، وده علشان نوصل لحلم تحقيق 140 مليار دولار كايرادات من الصادرات المصرية في 2030.. ده غير ان في عدد كبير تاني من المشروعات هيوصل عددهم لأكثر من 120 مشروع هيتم افتتاحهم مع نهاية العام الجاري أو مع بداية 2026 علي اقصي تقدير.
المشروعات اللي دخلت الهيئة الاقتصادية لقناة السويس حققت ايرادات وصلت لـ 8.6 مليار جنيه في الفترة من أول يوليو 2024 حتى نهاية مارس 2025 بزيادة 40% عن نفس الفترة من السنة اللي فاتت واللي وصل فيها معدل ايرادات المشروعات الجديدة هناك لـ 6.1 مليار جنيه.
مؤخرا مجلس إدارة الهيئة الاقتصادية لقناة السويس وافق علي انشاء وإدارة مجمع صناعي متكامل للخدمات والمرافق كتوسعات جديدة للمطور الصناعي تيدا-مصر واللي هتكون على مرحلتين هيتم الانتهاء منهم في خلال 8 سنين وهتوصل التكلفة الاستثمارية لمشروعات البنية التحتية والمرافق للتوسعات الجديدة لـ100 مليون دولار.
الهيئة الاقتصادية لقناة السويس مؤخرا بروصا اعتمدت 5 مشروعات جديدة بمنطقتي القنطرة غرب ووادي التكنولوجيا في عدد من القطاعات المستهدفة بإجمالي استثمارات هتوصل لأكثر من 49.3 مليون دولار ، ولسه في قائمة طويلة من المشروعات اللي بيتقدم بيها المستثمرين واصحاب رؤوس الأموال لتخصيص مناطق جديدة لبناء مصانع جديدة علشان تدخل ضمن روافد الدولة لزياردة الصادرات والوصول لحلم 140 مليار دولار في 2030.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
