يا ترى إيه هي مكاسب مصر من إقامة مدينتين متكاملتين للصناعات النسيجية فى الصعيد ، إيه هي أهم المنتجات اللي هتطلع من المصانع هناك ، وهل ممكن تكفي الاحتياج المحلي ونصدر منها كمان ولا لأ، وتأثيرها على صادرات الملابس والاقتصادي القومي هيكون شكله إزاي؟
في الساعات الأخيرة، الحكومة أعلنت عن إقامة مدينتين متكاملتين للصناعات النسيجية في المنيا والفيوم، ودي خطوة مهمة جدا وبتعتبر نقلة نوعية بتعيد الاعتبار لصناعة الغزل والنسيج في مصر، خاصة وإن مصر بتملك رصيد تاريخي في استغلال القطن المصري طويل التيلة، اللي بيعتبر من أنقى أنواع الأقطان على مستوى العالم.
ونقدر نقول، إن المدن الجديدة مش مجرد مناطق صناعية، لكنها هتمثل رؤية متكاملة لبناء منظومة نسيج حديثة، بداية من الغزل والنسيج، مرورا بالصباغ ووصولا لللملابس الجاهزة والمفروشات والصناعات المكملة.
" title="طفرة هتنقل الصعيد في حتة تانية خالص..مدن صناعية للنسيج في المنيا والفيوم" frameborder="0">
عندك كمان، التوسع في إنشاء مدن متخصصة هيقدر يساهم في تعميق التصنيع المحلي وتقليل التكاليف، وكمان تحقيق استدامة في الموارد ورفع جودة المنتجات، وده في حد ذاته هيعزز من تنافسيتها على المستويين الإقليمي والعالمي.
برضو، وجود المدن دي في قلب الصعيد مش صدفة، لكن بيعتبر توجه استراتيجي لربط الموارد الخام بفرص العمل في مناطق بتحتاج بشدة للتنمية، مع إتاحة بيئة صناعية متطورة تكون قادرة على استيعاب التكنولوجيا الحديثة وتشجيع الاستثمارات سواء المحلية أو والأجنبية.
والمشروع ده، هيكون ممتد على مساحة 11 مليون متر مربع، وبيستهدف جذب استثمارات مباشرة بتتجاوز 3 مليارات دولار، وكمان بيجي في توقيت مهم جدا، خصوصا في ظل ارتفاع الطلب العالمي على الملابس والمنتجات النسيجية ذات الجودة العالية، ومع سعي الدولة لزيادة صادرات القطاع من 2.8 مليار دولار ل 11 مليار دولار خلال 5 سنين بس.
كمان، إطلاق المشروع بنظام المطور الصناعي بالشراكة مع القطاع الخاص بيعكس توجه الدولة لتمكين المستثمرين الحقيقيين، وده هيحصل من خلال منحهم دور محوري في التخطيط والتنمية والإدارة والتسويق، وده هيقدر يفتح الباب قدام جيل جديد من المصانع القايمة على الابتكار والتكامل في سلاسل القيمة.
برضو، المشروع هيشمل إنشاء مدرسة صناعية متخصصة داخل كل مدينة، ومراكز لوجيستية وخدمية ومرافق صحية وتسويقية، وده كمان بيعكس نظرة شاملة بتضمن استدامة المدن واستمراريتها في خدمة الصناعة والمجتمع المحلي.
ضيف على كل ده، إن المدن دي بتعتبر فرصة ذهبية لزيادة الاعتماد على القطن المصري وتقليل الاستيراد من الأقمشة الأجنبية، وده بينعكس بشكل إيجابي على المزارعين والمصنعين.
وأخيرا، تطوير صناعة الغزل والنسيج بتعتبر خطوة استراتيجية بتأكد عودة القطن المصري إلى مكانته العالمية، وكمان بتأكد إن كل اللي بتقوم بيه الدولة من تحديث للمحالج وإعادة هيكلة الشركات وإنشاء مصانع جديدة، هو عبارة عن تحول حقيقي وإسجابي للصناعة دي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
