هو إيه اللي بيحصل في سوق العربيات؟ و ليه الأسعار نزلت فجأة؟ .. وهل العربيات هتفضل تتراجع كده ولا دي فقاعة وهترجع ترفع تاني؟ ولو عايز تشتري عربية دلوقتي .. تشترى تستنّى ولا تستنى شوية ؟ وأهم سؤال إيه اللي هيحصل في السوق الشهور الجاية؟
سوق العربيات في مصر بقى زي لعبة الكراسي الموسيقية .. مرة الأسعار في السما .. ومرة تنزل.. وخلينا نقولك إيه التطور اللي حصل في السوق في الربع الأول من 2025.
16 ماركة عربيات في مصر خفّضوا أسعارهم بنسبة تصل لـ15% .. يعني إيه عربيات كانت في المليون ونص بقت في المليون و200 ألف .. وفي طرازات نزلت من 30 ألف لـ240 ألف جنيه.
بس إيه السبب؟ و إزاي فجأة السوق اتقلبت كده؟
القصة بدأت من أزمة كبيرة .. السوق كان في حالة ركود غريبة .. وصفها التجار إنها "أسوأ أزمة في التاريخ" .. لأن الاستيراد كان متوقف .. والعربيات الموجودة في السوق كانت أسعارها مولّعة .. زائد رسوم إضافية ونقص في المعروض .. تخيّل إن الأسعار زادت 5 أضعاف في 3 سنين بس .. ده غير إن الناس كانت خايفة تشتري .. عشان كل يوم السعر يتغير!
المشكلة بدأت من منتصف 2024 .. لما شركات العربيات اكتشفت إن نظام التسجيل المسبق للشحنات متعطل .. يعني مفيش عربيات جديدة تدخل البلد .. وده خلّى السوق يقف .. لحد ما في فبراير 2025 الحكومة سمحت بفتح الاستيراد تاني .. وأفرجت عن العربيات المحتجزة في الجمارك .. وهنا بدأت الشركات تتحرك .. وتنزل عروض وتخفيضات عشان تكسر الجمود ده.
ليه الشركات خفّضت الأسعار؟
التخفيضات دي ماجتش من فراغ .. الشركات عايزة تبيع .. عايزة الناس ترجع تشتري .. و الشركات نزّلت الأسعار عشان تنشّط السوق وتجذب العملاء .. لأن الناس كانت فعلاً بقت عازفة عن الشراء .. مين هيشتري عربية وهو عارف إن سعرها ممكن يزيد بكرة.
فتح الاستيراد كمان خلّى المنافسة تزيد بين الوكلاء .. فكل واحد بدأ يقدّم عروض وخصومات عشان ياخد نصيب من الكعكة .. وده ظهر في الأرقام .. تقرير من مجلس معلومات سوق السيارات (أميك) قال إن المبيعات زادت بنسبة 51.3% في أول شهرين من 2025 .. يعني الناس بدأت ترجع تشتري فعلاً.
فيه حاجة اسمها "التشوهات السعرية التحوطية" .. يعني الشركات كانت بترفع الأسعار مش عشان التكلفة زادت .. لكن عشان كانت خايفة من زيادة سعر الدولار أو مشاكل في الشحن .. فكانوا بيحطوا زيادة احتياطي .. و التخفيضات الجديدة جزء من تصحيح الأسعار دي .. والشركات بدأت ترجّع ثقة الناس في السوق.
كمان .. خفض أسعار الفايدة من البنك المركزي في أبريل 2025 لعب دور .. الفايدة نزلت من 28% لـ25% .. وده معناه إن تمن القروض هيقلّ شوية .. والناس ممكن ترجع تفكر تشتري بالتقسيط
طب هل الأسعار هتنزل تاني؟
كتير من الخبراء استبعدوا إن الأسعار تنزل تاني في الوقت الحالي .. لأن أي هبوط في سعر الدولار (زي 3 أو 4%) مش هيأثر كتير على أسعار العربيات .. والسوق ده مش زي السوبرماركت إن النهاردة الطماطم تنزل بكرة ترخص.. هو سوق معقد .. تكاليف الشحن والجمارك والإنتاج ليها دور كبير.
لو عايز تشتري .. اشتري دلوقتي ولا استنّى؟
لو بتفكر تشتري عربية .. لازم تحط في دماغك كام حاجة السوق دلوقتي فيه عروض .. التخفيضات موجودة .. والمنافسة بين الوكلاء قوية .. يعني ممكن تلاقي صفقة كويسة.
محدش يعرف بكرة هيحصل إيه .. لو سعر الدولار نزل شوية .. التأثير هيكون محدود .. ولو الطلب زاد.. الأسعار ممكن ترتفع.
الفايدة نزلت.. لو هتشتري بالتقسيط .. دلوقتي أحسن من السنة اللي فاتت.. لو مش مستعجل .. ممكن تستنّى كام شهر .. بس فيه مخاطرة إن الأسعار ترجع ترتفع لو السوق اتغير
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
